日日我都好努力去諗D比較搞笑、

開心嘅嘢嚟寫網誌。

有時睇番D文章，

覺得好八婆、好想嘔！

其實我並唔係想寫D咁嘅嘢㗎，

只不過想寫D令大家睇得過癮嘅文章，

 

 

唔想大家睇完我嘅嘢然後唔開心喊咗出嚟咋！

我以前係一個好挑剔嘅人，

好聽D就係完美主義者；

唔好聽就係吹毛求疵！

呢個習慣已經被現實侵蝕咗唔少，

唔知係咪我有呢種特性，

我零舍容易察覺到人哋嘅小動作同壞習慣。

如果D人只係霹靂閃電眼，

我最多唔望佢啫！

但係D人都唔知做乜！

係咪食咗屎呀！

成日( 咯！咯！咯！) ( 唔！唔！唔！) ( 咳！咳！咳！)

如果係以前，

我一定會開聲話佢哋，

叫佢哋改。

我唔會理佢哋高唔高興，

亦都唔會理有冇 Hurt 到佢哋！

因為我覺得好核突、核突到想嘔！

但係我而家只會對兩個仔出聲，

因為我唔想佢哋將來俾人話俾人笑！

從懂事以來，

見識過唔少嘅嘢、

亦見識過唔少嘅人。

有D人真係好叻。

例如：佢哋唔會主動教你嘢；

有事發生，佢哋會扮唔識、

企埋一邊、唔會搭訕，咁就唔會揹鑊。

但係有D乜都唔識嘅人，

又比佢坐到個高位！

所以成日聲大大、認屎認屁、

講嘢懶高深咁、唔識又扮代表，

講咗出嚟連佢自己都唔知講乜！

好似今朝同嗰個高人同 lift 咁，

一出 lift 我想 gentleman  D 就行快 D 去開門，

但行錯咗方向：只係一步啫！

佢問我：『你想去邊呀？』，

我話：『走錯方向。』，

佢跟住話：『好似張國榮唱歌咁呀！』

我真係比佢吹漲！

正一傻婆嚟㗎！

我小魚豪係直㗎！

        我覺得呢個世界真係好奇怪、又覺得好好笑！每個團體、每個公司、每個工廠，唔理規模大小，都好似倒模咁；裏面梗有D人好nice、有D人好乞人憎。

 

        好似我以前間公司咁，有人好長氣、有人態度好差。冇嘢嘅，我唔採佢啫！

 

        而家間公司D人好nice，但係有一個女人，佢哋個個都唔鐘意佢，話佢格衰，我覺得佢唔知自己有問題啫，佢唔識檢討自己囉！不過對我嚟講係無問題嘅，因為我係工作上同佢係無接觸嘅。

 

       做嘢啫！放咗工又唔使對住、又唔係做人世，放過佢啦！ 

       無人同佢傾計都好慘o架！

        噚晚收到一個從法國打來的長途電話，是一位在大陸工廠做了我差不多十五年秘書的女士，她告知我她的近況，從她說話中可以感覺到她很開心、幸福，她說她的法國丈夫對她很好，她現在還幫丈夫掌管財政，法國佬連零用錢也要問她攞！

 

        最不幸是她的屁股仍然未康復，她的病如果在大陸醫一年也醫不好，在法國幾個月就OK。而且好在法國醫療是免費的！

 

        她說現在已開始上堂學法文，我同佢講我而家開始儲假儲錢，兩年後去探佢。佢話到時佢會揸車載我哋去玩。

 

        我衷心祝福我呢位知己朋友，永遠幸福快樂！因為佢真係一個好好嘅人，無機心、無野心、唔自私、又唔記仇。( 呢D都係跟我學嘅！)

        上星期六懶好心，又走咗去捐血，點知道又唔合格，佢哋話我D血紅素又唔夠喎！真係俾佢哋吹漲。呢次已經係連續第二次啦！成二百幾磅嘅人幾次捐唔到血，你話失唔失威吖！

         噚日响惠康買完嘢，順便睇吓有乜好睇又平嘅舊VCD，點知俾我一就到譚詠麟套 ( 花仔多情 ) ，我即時攞住，跟住攞埋隻 ( 君子好逑 )。呢兩套戲差不多係譚詠麟嘅代表作，而我自己對 ( 花仔多情 ) 就特別有深刻記憶 ……         响我十幾廿歲時，有位所謂好朋友叫我睇午夜塲，，我一口就答應咗佢，點知佢同埋條女一齊出嚟！重話要睇 ( 花仔多情 ) 喎 。我真係俾佢哋吹漲，呢套係愛情文藝片，你叫我一條傻佬陪你哋睇，我話走，佢哋又話唔好掃興，睇完戲去宵夜，OK！又陪吓你哋 ！

        嗰陣時係冬天，加埋D冷氣，我覺得有D凍，望吓佢哋，佢哋攬到實一實，而我呢條傻佬都有得攬 ( 自己對腳 )！你話係唔係好凄涼！嗰個環境、氣氛、加埋Alan嘅歌，我差D喊咗出嚟！所以呢套戲對我嚟講係別有一番風味！

        我好鐘意去旅行,  因為當你離開自己日日對住嘅地方, 又或者放下令自己好頭痛嘅工作, 去一個沒有人認得你嘅國家, 嗰種Feel真係難以形容, 就好似自己一個人搭機去, 重要轉機嗰隻. 一來可以增廣見聞, 二來可以訓練膽量同英文.
 
        阿爾卑斯山嘅宏偉, 萊茵河嘅美麗, 小山坡上有一個牧場, 牧場內有一堆綿羊, 一堆乳牛, Wa O! 呢D境通常係電視先見到, 如果想幫自己留低一D美好嘅回憶, 等得閒時合埋眼幻想一下當時情境, 咁一定要出去闖闖! 看看異國風情啦!